AILOCAL DIASABRA 10 OKTOBER 2015
Rossini van Wijk di Studio Belle Epoque “Monumentenfonds ta nos tur”
ORANJESTAD - Mañan atardi un grupo di cabayeronan y damanan bisti al estilo Victoriano di 1880 pa 1920 lo disfruta di un tea party.
E recaudacion di fondo aki na beneficio di Monumentenfonds ta wordo organisa pa Studio Belle Epoque. E lo tuma luga den e mesun sede di stichting Monumentenfonds cu ta un mansion restaura situa na Avenida Milo Croes 26, y e tin un balor den
forma di contribucion di 20
dollar.
Nos herencia E evento aki lo trece bek den presente un tradicion di pasado. Rossini van Wijk kende a bin cu e briyante idea aki a bisa cu e epoca aki Victoriano “tur cos tabata mas bunita”. El a referi na arte, arkitectura, musica, y mueblenan cu tabata bon elabora y yen di detayenan. El a bin cu e idea aki ya cu na Europa ta di moda e tipo di even
ementonan Victoriano. Cada luna tin actividad relaciona cu cultura di un pais of un echo historia cu nan ta celebra. Ela dicidi hunto cu otro miembronan di Studio Belle Epoque di organisa un “Victorian Tea Party”, pa apoya Monumentenfonds ya cu nos monumentonan ta parti di nos cultura. “E ta un herencia di nos cu mester keda pa esunnan cu ta bin despues di nos”, el a bisa. Igualmente e meta tras di e evenemento aki ta di trece Monumenten
fonds mas cerca di pueblo pa e hendenan no pensa cu ta gewoon un instancia. Ya cu “Monumentenfonds ta nos tur”, el a bisa.
Rossini van Wijk a declara cu cada monumento ta un herencia y nos mester ta consciente di e herencia aki. Un di nan ta e sede di e mesun fundacion aki cu “e ta un preciosidad di mansion”, pero masha poco hende ta consciente di su existencia. E ta bisa cu asina tin mas monumento rond di nos isla cu nos no ta aprecia debidamente.
Ambiente Victoriano Nan a dicidi di haci e tea party aki al estilo Victoriano pa e hendenan cu lo participa y contribui cu e fundraising aki bisti e moda ey tambe pa nan no solamente wak'e, pero tambe pa nan experiencie, y asina bo tin “un tiki e gevoel di antes”, y e cortesia cu nan
tabatin e tempo aya.
Na Europa tin tiendanan specialisa den trahenan aki. Na Aruba naturalmente nos tin cu adapta nos mes na e clima. Rossini ta bisa cu en todo caso e damanan mester ta bisti den shimis largo y e cabayeronan den flus of cu un camisa y gillete. E periodo aki tabatin su acesorionan specifico, manera canchi y handschoen. Pero pa haya un miho idea, Rossini ta invita tur hende pa bay riba nan pagina ‘Aruba’s 1st Victorian Tea Party” riba Facebook. E ta un pagina yen di informacion y tips kico pa bisti, pakico y kico no. E organisadonan tin e inmenso honor y placer di anuncia cu Aruba su Soprano, Sra. Tica Giel, lo ta presente pa canta algun aria durante nos Victorian Tea Party. Por cumpra e carchinan pa e Victorian Tea Party na Checkpoint Color den Columbusstraat. (Q)