LOCAL
E Faro a bira proyecto bandera di Stichting Monumenten Fonds pa 2016 Stichting Monumenten Fonds a cuminsa prepara riba Forno di Calki cu ta bay celebra 125 aña na 2017
ORANJESTAD - E aña aki cu Stichting Monumenten Fonds a celebra 20 aña di fundacion a bira un di e añanan mas fructifero for di nan fundacion. Na 2016 nan a logra concretisa proyectonan cu tabata pendiente pa basta aña a bira un realidad e aña aki. Pero no solamente proyectonan manera E Faro su renobacion a bira realidad, sino mantencion di edificionan monumental.
Directora Ir. Anne Witsenburg hunto cu Micla Nava kende ta PR di e fundacion aki, a duna un relato basta positivo di e trabou cu nan a realisa durante 2016. “Cu hopi orguyo nos por bisa cu nos a finalisa California Lighthouse”, Ir. Witsenburg a declara. E monumento aki cu ta un icono arkitectonico di Aruba aworaki ta habri pa publico caminda nan ta duna un contribucion pa subi y disfruta di un bunita bista panoramico. Pa e fundacion aki, E Faro a bira e proyecto bandera di 2016, ya cu nan a traha pa mas cu cuater aña largo den e proyecto aki. El a bisa cu e trabou nunca ta cla ya cu unabes cu e restauracion a bin cla, nan ta cuminsa cu e mantencion di e monumento aki.
San Nicolas y Oranjestad El a indica cu e trabou di mantencion ta hopi importante. Pesey e aña aki un edificio cu a conoce trabou di mantencion completo ta esun di Contraloria General situa na Wilhelminastraat. Tambe nan ta preparando un plan di mantencion na 2017 pa edificio di watertoren na Playa y tambe na edificio di Arina banda di parada di Arubus na Playa.
E aña aki tambe nan a pone atencion na San Nicolas caminda nan bin cla cu e restauracion di Nicolaas Store. E ta un proyecto hopi special pa e fundacion aki, ya cu e tabata e prome proyecto cu nan a cumpra un edificio for di un famia, ya cu nan no a traha cu gobierno den e proyecto aki. Pero si nan ta bay huur pa pais Aruba como e Museo Comunitario. No solamente nan a restaura e edificio sino cu nan a pone un lift nobo cu ta e prome di e tipo aki den
pm ame:
Caribe, ya cu e no mester di algo electronico pa traha. “Nos ta spera cu Nicolaas Store ta bira un biaha mas un punto di encuentro di hopi hende na San Nicolas”, el a bisa. Otro proyecto cu nan ta preparando pa e proximo aña tin di haber cu Uncle Louis Store na San Nicolas. Tambe nan a pone atencion na e casnan di palo na San Nicolas Igualmente na Oranjestad e fundacion aki ta den combersacion cu ATA pa wak si nan por muda pa un monumento cu nan por restaura pa nan. Directora di Stichting Monumenten Fonds Aruba a bisa cu esaki ta un proyecto grandi cu nan ta traha riba dje na 2017.
Bario Rancho
E aña venidero Rancho lo haya mas atencion di e fundacion aki. E bario aki tin un balor historico y monumental cu caracteristicanan propio. Directora di Stichting Monumenten Fonds a señala cu e trabou pa preserva nos monumentonan no ta solamente e piedranan, palonan y glasnan, sino cu ta trata di hende.
Na Rancho tur hende sa cu ta existi problema social y e fundacion aki ta dispuesto pa traha cu tur parti envolvi hunto cu Stichting Rancho pa wak con pa drecha henter e area aki, y no solamente e monumentonan. Nan por mira cu tin proyectonan special unda diferente instancia ta envolvi.
Mientras cu Stichting Monumenten Fonds a cuminsa prepara pa otro aña pa traha riba e famoso Forno di Calki cu ta bay celebra 125 aña. “Esaki ta un momento pa wak kico nos por haci”, el a
bisa. Nan ta trahando riba un peticion pa restauracion di e
forno aki cu actualmente ta un monumento protegi. E balor di e monumento aki no ta su bunitesa, pero su historia ta hopi importante, ya cu e ta un monumento unico no solamente na Aruba pero henter den Caribe.
“Nos ta hopi contento cu nos por wak un mehoracion riba conscientisacion di hende tocante monumento.”, el a bisa. Durante e ultimo lustro e fundacion aki por wak un cambio hopi grandi riba e tereno aki y nan ta hopi contento cu e logro aki. Nos
hendenan a cuminsa mira nos monumentonan como un parti masha importante. Un ehemplo tabata ora cu un monumento a wordo daña cu grafħiti riba dje, e reaccion di e hendenan den media social y di diferente forma tabata fuerte.
Educacion Micla Nava kende ta encarga cu e parti di Educacion, a bisa cu nan a haci enfasis riba e tereno aki cu diferente proyectonan. Entre otro nan a duna guia na e studiantenan Arubiano cu ta bayendo universidad na Hulanda cu a haci trabou di investigacion
riba e casitanan di palo na San Nicolas. Tambe a base di e aliansa cu nan tin durante e ultimo cuater aña cu studiantenan Hogesschool Rotterdam, nan a bin dos siman caminda nan a studia e edificio monumental Veneranda y nan a traha un plan pa e area aki den pleno curason di Oranjestad den cuadro di e proyecto “Playa Mi Orguyo”.
Igualmente e aña aki nan a lansa nan proyecto Nos Herencia den e tereno di educacion ya cu nan ta riparando
A31
DIAMARS 27 DECEMBER 2016
cu nos muchanan di scol basico y hasta secundario, cu no sa e nificacion di balor di nos monumentonan. E ta un proyecto cu ta culmina na maart 2017, caminda e scolnan interesa lo por participa pa asina nan studiantenan por haya tur informacion basico riba rond di monumento y dicon nan ta importante pa nos; y con nan por contribui pa yuda cuida nan.
“E aña aki ya nos a duna mas of menos 1200 mucha cu sa kico ta un monumento”, Nava a bisa. Nan a forma parti di diferente proyecto manera Paseo Monumental y tambe Expedicion Arkeologico.
Tambe nan a publica un buki traha pa studiantenan Hogesschool Rotterdam kendenan a haci trabou di investigacion na e casnan di cunucu . E buki aki a keda presenta na september ultimo durante e Luna di Monumento, cu ta un guia valioso pa e doñonan di casnan di cunucu, caminda nan un idea con nan por adapta nan cas na e deseo di awendia.
E aña aki nan a traha cu studiantenan di IPA cu a realisa nan proyecto social a yuda traha un buki cu ta wordo uza pa organisa caminata tanto na Oranjestad como na San Nicolas cu informacion relaciona cu e diferente monumento situa den ambos districto. Na Maart proximo nan lo bay presenta e buki aki caminda cada scol lo haya e buki aki pa cada mucha por siña mas riba nos monumentonan a base di actividad organisa pa e mesun scol.
E fundacion aki tin palabra di gradicimento pa studiantenan di EPI, ya cu un biaha mas nan a traha hunto e aña aki, caminda aña pasa nan a restaura e mecanismo di E Faro; y e aña aki nan a haci e lens completamente limpi pa nan. Esaki lo forma parti di otro proyecto pa 2017, caminda nan ta bay haci un exposicion cu tanto e lens como e mecanismo original di E Faro. E idea ta pa nan por bira un exposicion cu nan por move na diferente area pa nan comparti informacion masivamente cu nos hendenan local y bishitantenan.