Sala di exposicion virtual di UNOCA
“Visualisando Dicho, Proverbio y Expresion”
Panaroma di e exposicion na UNOCA
Sociedadnan multicultural manera Aruba, por existi danki na idioma, por medio di cual ta traspasa y conserva tradicionnan y culturanan na un manera sostenibel.
Cu e exposicion aki e arte verbal y e arte visual a uni pa asina nos por disfruta di e rikesa di nos Papiamento y creatividad di nos studiantenan. Actualmente nos ta bibando den un mundo cu ta hopi visual, unda nos ta rondona di imagennan. Pa e motibo aki e ta un excelente idea pa combina e rikesa di nos lenga cu e poder di expresion visual, pa traspasa e historia, sabiduria y hasta un tiki humor pa nos futuro generacionnan. Traspaso di nos cultura ta haci cu esaki ta keda biba den generacionan nos dilanti. Cu e arte di pintura y lesando e dicho of proverbio nos ta experiencia e profundidad di locual esaki ta representa y ilustra.
Nos idioma Papiamento conoce varios dicho y proverbio. Nan ta parti di nos herencia cultural y ta e forma pa keda conecta cu nos pasado mientras nos ta mirando pa futuro.
E Exposicion “Visualisando Dicho, Proverbio y Expresion” ta un proyecto di UNOCA Aruba conhuntamente cu Ministerio di Cultura, Ministerio di Educacion, Fundacion Lanta Papiamento y UNESCO Aruba.