Balki di tempo, Aruba den temp’i guera, 1939-1945
E balki di tempo aki ta duna un bista di e eventonan historico cu a tuma lugar na Aruba durante e temporada di Segunda Guera Mundial. E balki di tempo ta un expansion di e balki di tempo cu a wordo traha pa e exposicion cu a habri 18 di maart 2025 na Archivo Nacional Aruba.
Prome cu Segunda Guera Mundial a cuminsa, tin hopi incidente rond mundo ta tuma luga cu lo causa su comienso. Pa Aruba e momento historico ta ora na 1924 Capitan Robert Rodgers ta yega Aruba pa bin inspecciona e pier y infrastructura existente cu a keda uza pa exporta fosfaat for di San Nicolas. Ta dicidi cu Lago lo wordo establece kinan pasobra na Corsou e Sint Annabaai ta ocupa caba pa Shell y Aruba ta mas cerca ainda di Maracaibo na unda e zeta crudo ta wordo saca di tera.
Na 1928 Lago ta habri e rafinaderia na San Nicolas cu lo expande pa bira un di e rafinaderianan mas grandi pa produci producto petroleo, especialmente producto cu octave halto, pa e aliadonan durante Segunda Guera Mundial.
Si tin error, sugerencia, of pregunta por tuma contacto cu nos na [email protected]
E proyecto “Balki di tempo den temp’i guera” a wordo prepara door di Archivo Nacional Aruba bou di e coordinacion di Johny van Eerden
Algun fuente principal ta:
- “Aruba den temp’i guera” – un proyecto di Archivo Nacional Aruba cu ayudo di Amigonan di Archivo publica na 2010 pa conmemora 65 aña di fin di Segunda Guera Mundial.
- Lago Oil and transport Company Collection (Aruba) Coleccion Biblioteca Nacional Aruba
- Coleccion thematico dedica na Segunda Guera Mundial riba Coleccion Aruba
