Diabierna 30 di juni 2023, Archivo Nacional Aruba y Biblioteca Nacional Aruba a publica e database historico di e personanan sclavisa na Aruba 1840-1863, un database transcribi den un proyecto conhuntamente cu Hulanda. Pa e database a uza un cantidad grandi di diferente fuente di Archivo Nacional Aruba manera: e registro di Emancipacion di 1863, lista di persona sclavisa, registro di nacemento y fayecimento di persona sclavisa, peticion y acta notarial cu informacion tocante bendemento y cumpramento, traspaso y manumision di persona sclavisa.
Pa medio di e database por busca e fam cu un persona sclavisa a ricibi na final di e epoca di sclavitud, pues cu ayudo di e database por sigui busca bek den e pasado di sclavitud. Ta di remarca cu e database ta importante tambe pa enseñansa y cultura den e isla. Si bo persona ta busca informacion tocante un familiar cu tabata catibo entre aña 1840 y 1863 na Aruba por tira un bista den e documento “zoekhulp”. E documento aki ta fungi como guia y ta duna recomendacion ora di busca/haci investigacion.
Den e index aki bo persona por haya nomber di catibo durante di e epoca di sclavitud, nomber y fam durante emancipacion, e genero, fecha di nacemento, nomber di mama, e profesion y religion. Tambe por haya informacion di doño (miho conoci como “shon”) y remarke di e fuentenan. Banda di esey, tin e sorto di acontecimento y e fecha di esaki. Manera a menciona anteriormente, e index ta consisti tambe di informacion di doño di catibo manera: nomber y fam, luga di residencia y remarke eventual di e fuentenan. Finalmente, tin nota di e fuente di referencia.
Archivo Nacional Aruba hunto cu Biblioteca Nacional y Universidad Radboud na Nijmegen a crea un database nobo. E prome version di e database ta solamente e comienso. Pa e database tin como meta pa sigui enrikece, crece y extrae mas informacion cu ta posibel for di dje. Mester resalta cu a haci e database disponibel na Papiamento tambe, pa asina hacie mas propio y parti di nos. Pa remarca, Peter Scholing (BNA) ta trahando riba e siguiente version di e data y di e database aki, entre otro door di conecta mas di e “missing links” na otro, pa asina e ta mas interesante y rico tanto den su contenido como visualmente. Di e manera aki lo por extrae mas informacion, wak e lasonan familiar entre e personanan y bay mas den detaye ora di busca un hende y nan famia. Pronto e version nobo y enrikecido aki lo wordo anuncia y lo bira accesibel tambe riba e portal di Coleccion Aruba.
Update 8 april 2024
E database version 2.0 ta accesibel via e link aki.
